通渠佬與 IT 人

以下文章轉載自討論區，雖然言論未免過激，但又真係幾好笑喎！

**********************************************************
通渠與 IT

今日在做 IT 資訊科技，幾乎成為了一種負擔，因為姨媽姑姐三姑六婆叔伯世姪人人都要上網，於是識 IT 的你，就變成一種原罪，要時時刻刻分分秒秒償還的罪。以前常聽 IT 界的朋友說：「再過幾年，人人都上網，在新的時代，做呢行一定好景啦！」－－結果剛好相反，近年從事 IT 界的專才，幾乎人人都急著跳船跳槽，甚至平日要扮 IT 盲，以免受到親朋戚友無止境的壓迫與詛咒。

IT 界之內包萬有，有人寫程式，有人畫圖像，有人做設計，有人搞網絡－－當然，最基本的 Wintel 系統，多少都會懂得使用，可是表面易用的背後，卻有很多麻煩鎖碎的事情，需要熟習與思考，遇著既懶、鈍又或者先天缺乏機械觸角的朋友，就立即膠到冇朋友。

秀才遇著兵，有理說不清，一般人既不肯學原理，又不肯花功夫自己試，卻要求多而手法不乾淨，必須的保養、維護的工作都不做，結果電腦長期七勞八傷，就正如不停把 M 巾與各種垃圾塞入馬桶，終有一天一定令馬桶閉塞，於是大嘆一聲：「好嬲呀！部電腦又唔聽話呀！」

當然了，咁用機就自然會唔聽話了，可是問題就來了，壞了電腦要怎樣處理呢？這時三姑六婆姨媽姑姐叔伯世姪兄弟等鄉親父老，就會諗起阿三姑媽的四叔婆的五外孫的朋友的朋友，其實係讀 IT 的（對，讀 IT 同修理電腦有咩關係呢？)，所以要他幫手修理。

讀 IT 和修理電腦的關係，就正如治理江河的水利專家，與通渠佬的關係－－廁所水同黃河，大家的水都係黃啡色的，因此電腦壞了，就要找大學讀 IT 的人去修理了，這就是一般人的邏輯。

可是做「通渠佬」，畢竟比「IT 人」好，通渠通常很暢快，雖然臭一點，但最起碼立竿見影，通就通，唔通就唔通，一兩個鐘就可以走人；另一方面，朋友們總不好意思叫你免費通渠，也不會在通渠失敗之時，叫你拆了馬桶回家再慢慢通－－眼不見為乾淨，你在家修理三十個鐘，對方隨時連一句有誠意的「多謝哂」都沒有，反過來再遇到問題，立即又詛咒你：「乜果個大學讀電腦的友仔咁渣o架，呢頭修理完果頭又壞！」即使通渠不久後又爆屎渠，大家都會怪罪於亂拋垃圾的人，至多都是怪罪於馬桶，而不會怪罪於那個不幸的通渠佬。

於是乎醒水的，為求自保的，有其他出路的，都盡量詐傻走人；餘下忠直的一群，就變相承擔了更多的義務，承受更多的「任務」，天天從「大禹治水」的理論之中，演化出實地表演疏通坑渠水的絕技！當中有比較純真而忠直的男士，被封為「毒男」－－因為純情的他們，常被身邊的女同學、女同事、女性友人等等，當作免費的苦力，美其名為「觀音兵」，實為「無償通渠佬」，除了心理另類或變態者之外，很少人能夠從中得到幾多樂趣。

其實通渠佬真的好做過 IT，至少馬桶的故障率較低，朋友也不好意思把你四圍「推介」或者「出賣」，叫你去長期做無償的免費勞工；而解決方法只得一個，應該把「電腦醫生」或「電腦維修員」或「電腦坑渠佬」的工作，改為有如醫生、律師等專業的「時薪制」，要應付那些千奇百怪麻煩的繁瑣事務與查詢的時候，合理地按時收費，而不是今日的「老奉制度」，於是識的要扮唔識，要由一些唔識的去扮識，結果兩敗俱傷。

當然，以上的一廂情願的建議，係永遠冇可能發生的－－點解？因為市場被人性的「極品硬膠」扭曲了，當明明沒有 supply，demand 高居不下之時，可是絕大多數人仍然覺得呢件貨唔值錢，死都要覺得用一蚊可以買到一個飯盒，於是大家就只去供應假飯盒，而最過癮的，係買主膠到連貨都唔識分，明明食緊紙，卻以為食緊飯，食極都唔飽的結果，都只係識買多幾盒來食，然後大鬧：「點解食極都唔飽的？」

點解？因為這叫瘋子市場－－任何常理都不適用的地方，而無論任何「干預」，亦一樣都無法挽救的「真心膠」。
****************************************************************

我的見解：

『一個讀 IT 的人點解又一定要識整電腦呢？』

邏輯上，這個問題相當於：一個學駕駛的人，學成了，車牌也考過了，是合格的司機。一天，他的車子壞了，但他不懂如何修理。於是，他發個輪，叫了拖車拖回去，慢慢修理，然後他付錢。

對於這種情況，無論是否大學修讀 IT 的，都會絕對認同其合理性。還會說：那有什麼希奇？背後的邏輯是：一個懂得駕駛的人，並不一定懂得修理汽車。但原來，這個邏輯的背後，是有一個比較高層次的、約定俗成的道理：在這個社會上，駕駛技術和修理汽車(即機械)技術是完全分開的兩種技術，它們是分工的。這是一種對常識的認知。

問題來了，在社會上，竟然普遍地認為，在大學裡讀 IT 的人，就必然懂得修理電腦 (而且修不好可能還會被人 X 呢！)

這是一種誤解，是認知上的錯誤。

只要大家登入各大學的網頁，然後翻查一下電腦學系所提供的課程，不難發現，當中根本沒有專門教人維修電腦的課程。這意味著，大學的電腦課程並非是要訓練出一位電腦維修員 ── 無論你是否認同。

可是專門教人維修電腦的課程，在坊間卻比比皆是。

當然，久病能醫，揸得車多，都會識少少汽車維修的原理。同樣， IT 人因為每天都接觸電腦，多多少少也會懂一點維修保養的技巧。可是，他或她是沒有義務在事發現場做一個 『IT 神』的。意思是 IT 人並非大家心目中的萬能老官，他 \ 她只是一個人，不是神，沒有必要在你所期望的時限之內完成解決千奇百怪問題的任務的。

IT 裡面的知識，是分得很仔細的，而且是驚人地仔細。一個程式員的 programming skill 可能非常了得，但他 \ 她對維修電腦卻未必是專家；同樣一個攪 computer graphics 的人也並不一定是攪 infrastructure、Wintel server 或 Lotus Notes clustering 的箇中高手。

當然，明係識而扮唔識，而問題又屬於其份內事的話，那此人當真抵打！

至於有 IT 人要被人要求去修理影印機或冷氣機，那更是天大笑話！