告別星光，依然美麗！

晚飯於淘大『鐵匠』日本料理的一個snapshot。侍應推介的刺身沙律，唔錯，幾好食。 但圖中嗰碟查實係小食『螺肉』。


今日在德福的商務打完半小時的『書釘』(冇錯，係有史以來最短的！)，只『掃』了兩本書便怱忽離開。(約了愛妻食晚飯，冇計。)一向酷愛攝影的我，又怎會錯過『100個拍好人像的方法』這種印刷精美的台版翻譯書呢？雖然書名勁老土，激似甚麼『快快樂樂學攝影』之類，但厚磅光面粉紙印刷，字體大小適中，裡面的彩色相顏色豐富艷麗，黑白相反差良好，排版舒服。加上每張相的設計及構思、光圈快門鏡頭焦距等等一應俱全，雖然要成舊水有些肉痛(不知是否一個方法要一蚊)，但管他娘的，買了才算。



夜深了，回家後從膠袋取出兩本書，噫？『文化聚焦，書海無際；告別星光，依然美麗』？赫然發現星光行商務要『摺』的消息。還有兩張5月和6月的 coupon，嗯，幾好，幾好 (sell 得好)。心道，唉，真『背』，冇浦老尖幾個禮拜，連間旗艦要摺都唔知。原來間旗艦一搬搬了去美麗華，2萬2000呎，怪不得『依然美麗』了。


不過論方便，論親切感，始終首推星光。回想以前返工返廣東道，要打書釘，priority one 就是 "Page One"，中英文書齊備，更有大量高檔攝影書。Page One 壓根兒就在公司樓下，在此打書釘，已經打到變成圖書館。午飯時間，三個字食完，然後用九個字磨 "Page One"，你都咪話唔爽！


次選就係星光行商務，通常放工先會去。行就係要行遠少少，不過其實冇所謂。一來鋪大有海景，二來真係好多，好多書，名乎其實的書海。就算 technical 的英文書也大量供應。入理大讀 master 前買的 "Advanced Engineering Math" 都係幫襯佢。重有，佢擺自然科學書的巨大數量，其他鋪根本冇得比，正！

星光行商務的海景 view。圖片來源：明報。

星光行商務因加租搬遷的前因後果：http://hk.news.yahoo.com/070428/12/26g6i.html


新旗艦明天開張，一於走去八吓。http://www.cp1897.com.hk/html/mkt/tst/tst.htm


(註：我買的另外一本書是『費曼的彩虹』。曾經諗過，好想、好想寫費曼，好讓『你地D香港人』知道，世上除了愛因斯坦同牛頓之外，還有你這麼一個玩物理玩到攞埋諾貝爾獎的黐線佬！)